„Тврдењата дека овие позиции не треба да се поврзуваат со етничка припадност, туку исклучиво со професионални критериуми, запоставуваат еден од темелните принципи врз кои е изграден институционалната рамнотежа во државата – правичната и соодветна застапеност. Овој принцип не е политички компромис, туку уставен стандард и клучен елемент за довербата на граѓаните во безбедносните институции.“ – наведува ДУИ.
Оваа опозициска партија потоа ја конкретизира „етничката димензија“ на својата „сериозна загриженост“: Во сегашните околности, кога значителен дел од овие позиции ги држат Албанци, нивното укинување без јасни механизми за гарантирање на застапеноста создава реален ризик од нарушување на постигнатата рамнотежа. Општите изјави за „нема потреба од загриженост“ не се доволни. – посочуваат „интегристите“ од тетовска Мала Речица.
Според нив, „потребна е целосна транспарентност за новата систематизација, критериумите за избор и конкретниот начин, на кој ќе се обезбеди правичната застапеност во раководните структури на Министерството за внатрешни работи“. „Безбедносните институции не смеат да се третираат како простор за организациски експерименти без проценка на нивното политичко и општествено влијание. Секоја реформа во овој сектор треба да го зајакне професионализмот, но истовремено да ги зачува меѓуетничката рамнотежа и институционалната доверба. Секое отстапување од овие принципи ќе има долгорочни последици врз демократското функционирање и врз општествената кохезија во државата.“ – тврди ДУИ во своето денешно соопштение.