Американскиот претседател Доналд Трамп се закани дека ќе го попречи отворањето на новиот мост што ги спојува Соединетите Американски Држави и Канада, сè додека Вашингтон не добие „целосна компензација“ за сите штети што му ги нанел северниот сосед.
Меѓународниот мост „Горди Хау“, кој ја поврзува канадската провинција Онтарио со американската држава Мичиген, нема да биде пуштен во употреба сè додека Отава „не се однесува праведно кон САД и со почитта што ја заслужуваме“, објави Трамп на социјалните мрежи, пренесува Би-би-си.
Во пораката на својата платформа Truth Social, Трамп изјави дека САД би требало да поседуваат „барем половина од овој објект“. Тој тврди дека Канада го контролира и канадскиот и американскиот дел од мостот.
Според официјалната веб-страница на проектот, Windsor-Detroit Bridge Authority, организацијата одговорна за развојот на мостот, е во целосна сопственост на канадската влада.
„Канадската влада очекува од мене, како претседател на САД, едноставно да им дозволам да ‘ја искористат Америка!’“, напиша Трамп.
„Нема да дозволам овој мост да се отвори сè додека САД не бидат целосно компензирани за сè што им дадовме“, додаде тој.
Не е веднаш јасно на кој начин Трамп би можел да го спречи отворањето, но тој најави дека преговорите ќе започнат веднаш, без да прецизира детали.