Владата на српската Автономна покраина Војводина ќе биде покровител на изградбата на споменик „Мајка Македонија“ во Нови Сад како траен симбол на македонската заедница.
Во знак на благодарност, претседателката на Македонскиот национален совет, Зорица Митровиќ, ѝ подари гипсена скулптура на претседателката на Покраинската влада, Маја Гојковиќ, на која мајка држи дете во раката.
Споменикот се очекува да биде поставен до крајот на годинава, во која се одбележуваат осум децении од доселувањето на Македонците во Војводина.
„Македонскиот национален совет ја поздравува институционалната поддршка и соработката, уверени дека споменикот ќе придонесе за зачувување на историската меморија, културниот идентитет и видливоста на македонската заедница во Војводина“, соопшти Советот со седиште во Панчево.
Според последниот попис од 2022 година, во Србија живеат 14.767 Македонци, од кои 7.021 во Војводина и 4.293 во Белград.
На Македонците им се загарантирани малцинските права во Србија, а македонскиот јазик е официјален во Јабука, Панчево, Дужине и Пландиште.