Претседателот на САД, Доналд Трамп, ги спореди првичните напади врз Иран со јапонскиот напад врз американската флота во Перл Харбор, кој ја внесе Америка во Втората светска војна.
Тој ги даде овие забелешки за време на состанокот со јапонскиот премиер Санае Такаичи во Овалната соба, објави „Ју-Ес-Еј Тудеј“.
„Никому не кажавме за тоа затоа што сакавме да биде изненадување. Кој знае за изненадување подобро од Јапонија?“, рече Трамп со смеа, додавајќи „Зошто не ми кажавте за Перл Харбор?“
Очите на Такаичи се раширија, нејзината насмевка исчезна додека се наведнуваше напред и ги скрстуваше рацете при споменувањето на Перл Харбор.
На 7 декември 1941 година, јапонските бомбардери ја уништија речиси целата американска Пацифичка флота на Хаваи. Повеќе од 2.400 Американци загинаа во нападите. Јапонците ги извршија нападите без предупредување и без објавување војна. Перл Харбор стана траума за Соединетите Држави која не е залечена со децении.
Трамп беше прашан од новинарите зошто не ги информирал сојузниците во Азија и Европа за војната пред да започне на 28 февруари.
„Ако одам и им кажам на сите за ова, нема да има повеќе изненадувања“, рече претседателот
Трамп рече дека војската уништила „многу повеќе“ цели отколку што се очекувало во првите два дена од нападот. Претставници на Пентагон изјавија дека САД погодиле 7.000 цели во Иран и потопиле или оштетиле 120 ирански воени бродови.