Внимавајте, се снима. Камерите во март регистрирале над 7 илјади прекршоци повеќе од февруари. Во исто време, поднесените приговори до судот бележат намалување, особено кај правниците лица, кои во почетокот од функционирањето на системот имаа проблем со возилата на лизинг и возилата што не се одјавени во МВР. Граѓаните велат, подобрување има, но сообраќајната култура сè уште не е на потребното ниво.
Побезбедно во сообраќајот, но движењето од еден до друг крај на Скопје сега е поспоро бидејќи правилата и ограничувањето од 50 километри на час мора да се почитуваат. По вториот месец на активна примена на Безбеден град, граѓаните ги гледаат позитивните промени во скопскиот сообраќај, но имаат и предлози како да се намали гужвата.
- „Јас би направила како што беше порано. Парни броеви во еден ден, а непарни во друг ден бидејќи се создава многу голема гужва и за пешаци и за возачите“, вели граѓанка.
- „Добро е сега. Побезбедно е“, заклучува жител.
- „Младите не почитуваат ни камери ни казни. Пак има некои со јаки коли кои поминуваат на црвено светло“, смета граѓанин.
Експертите оценуваат дека безбеден град дава резултати, но советуваат дека е потребно вистински да профункционира јавниот превоз и повеќе да се користат велосипеди. Најголем дел од прекршоците се однесуваат на брзо возење.
Системот безбеден град почна да функционира на 1 февруари во Скопје, Тетово, Куманово и коридорите 8 и 10, со тоа официјално почна и санкционирањето на граѓаните коишто направиле прекршок детектиран од камерите на „Безбеден град“.