Македонија останува со најевтини горива во регионот среде наглиот раст во светски рамки по почетокот на нападите од САД и Израел врз Иран и возвратните ирански удари земјите од соседството.
Еден литар дизел во Македонија по најновото зголемување се продава за 1,59 евра, а највисока цена има во Албанија од 2,33 евра, поради што е забележана навалица од албански граѓани од пограничните градови во Струга на еднодневни излети заради точење гориво, покрај пазарењето.
Втор најевтин дизел има Бугарија од 1,61 евра, а трет Унгарија од 1,62 евра. Со многу повисоки цени следуваат Црна Гора со 1,78 евра, Словенија со 1,81, Србија со 1,82, Босна и Херцеговина со 1,84, Хрватска со 1,85 и Романија со 2,05.
Покрај дизелот, Македонија има и најевтин бензин во опкружувањето од 1,35 евра за литар, а најскап е во Албанија од 1,88 евра. Меѓу нив се Бугарија со 1,44 евра, БиХ со 1,45, Унгарија со 1,54, Црна Гора со 1,59, Србија со 1,61, Словенија со 1,62, Хрватска со 1,66 и Романија со 1,83.