„Во С.Македонија започна бран на револт против компанијата Кока-Кола по нејзината кампања ‘Сподели Кока-Кола’, која дистрибуира етикети само со словенски и торбешки имиња, напишани на кирилица, исклучувајќи го албанскиот јазик и Албанците, кои сочинуваат повеќе од 24 отсто од населението на земјата.“ – објавија „Иинфошќип“, „Прес.тв“, „Шќип“ и некои други медиуми на албански јазик во Македонија, во информација со наслов „Кока-Кола во С.Македонија ги дискриминира Албанците и албанскиот јазик – започнува кампања за бојкот“. Без никакво завлегување во самата кампања и мотивите на нејзините покренувачи, се наметнува дилемата, која има призвук на скандал врз етничка основа и на негација на постоењето на македонскиот народ во неговата сопствена држава: какво значење има формулацијата „етикети само со словенски и торбешки имиња“, која ја употребиле покренувачите на односната кампања?! Дали можеби според нив во Македонија нема и не живеат Македонци, туку само „Словени и Торбеши“?!
Од причини да одбегне какво било можно сопствено учество во можното нанесување штета на деловните интереси на компанијата „Кока Кола“ редакцијата на „Експрес“ го пренесува уште само оној дел на споменатата информација на медиумите на албански јазик, во која се тврди: „Кампањата ‘Сподели Кока-Кола’ се промовира само на македонски јазик, таа ги навредува албанскиот идентитет и јазик, а активностите се одвиваат исклучиво во Скопско, Гевгелија, Дојран, Штип, Струмица и Битола – градови каде што Албанците се малцинство.“ – објавија „Иинфошќип“, „Прес.тв“, „Шќип“ и некои други медиуми на албански јазик во Македонија.