Одлично се одвива подготовката за изградба брзата пруга на Коридор 10, изјави вицепремиерот и министер за транспорт Александар Николоски. Тој рече дека сега следуваат јавни презентации за студиите по што ќе подготват договорите за финансирање и за изведба и презентација на условите за финансирање пред Собранието. Николоски потврди дека рокот за старт на работите останува крајот на годината.
- Изработката на еколошката студија и на студијата за влијание врз социјалната средина е готова. На почеток на август ќе има јавни презентации, ќе има најмалку четири – во Скопје, Велес, Демир Капија и во Гевгелија каде што ќе може локалното население да се запознае. Се работи навистина за квалитетен документ од скоро 1600 страници којшто ги опфаќа сите аспекти. После тоа на него се прави ревизија, односно се вклучуваат коментарите на локалното население и согласно договорот којшто го имаме, до 31-ви август оваа работа треба да биде завршена, по што би влегле во конкретизирање и пишување на договорите за финансирање на проектот и за изведба на проектот. Се е според планот како што најавив – изјави Николоски.
Прашан за детали околу финансирањето, укажа дека согласно со домашните закони условите ќе бидат јавно презентирани во Собранието и оти дотогаш не може да се споделуваат со јавноста.