Во декември во делот на храна и пијалоци има намалување на цените, а истото е забележано и на почетокот на месецот јануари, поради тоа нема причина за некакви мерки. Ова го изјави министерот за економија и труд, Бесар Дурмиши, одговарајќи на прашањето за мерките за намалувањето или стабилизирањето на инфлацијата. Наспроти ова, граѓаните, барем оние со поплиток џеб реагираат дека цените од ден на ден стануваат се повисоки, однсоно дека на рафтовите во дуќаните гледале залепени нови цени, повисоки.
Министерот вели ако има енормно зголемување на цените, како што имало во минатото, ќе бидат преземени мерки, но во овој момент, потенцира дека такво нешто не е потребно.
- „Сега засега не гледаме причина за превземање на некакви мерки, ограничување на бруто профитна маржа или ограничување на цени. Секојдневно ја следиме ситуацијта, во комуникација сме со претставниците на ДПИ, ако има потреба, како што сме реагирале во минатото, така ќе реагираме и оваа година. Но, во месец декември, уште еднаш да потенцирам, во делот на храна и пијалоци, инфлацијата, односно цените се намалени за 0,4 проценти и убеден сум, верувам дека овој тренд оваа година ќе продолжи“, вели Бесар Дурмиши.
Министерот посочи дека ситуацијата се следи секојдневно во соработка со Државниот пазарен инспекторат, но во моментов нема енормни зголемувања кои би барале државна интервенција на пазарот.