Хрватска од следната недела почнува со примање барања за издавање на посебни долгорочни визи со траење од една година за професионалните возачи на камиони и автобуси од Македонија и од земјите од Западен Балкан. Поднесувањето на барањата за овие визи официјално е закажано да започне од 23 септември 2026 година.
Но, Хрватска сама не може да го реши целиот проблем. Вакви визи ќе бараат околу 80 илјади возачи од четири земји од Западен Балкан. Многу важна е и Германија, каде завршуваат голем дел од македонските камиони. Но, таа засега бара едно заедничко решение за цела Европска унија. Такво решение нема, па Владата сега преговара со секоја земја посебно. Според министерот за транспорт Александар Николоски договори веќе има со Хрватска и Швајцарија, а се разговара и со други држави.
Амбасадите на Хрватска во земјите од Западен Балкан првично ќе почнат да примаат помал број барања дневно, а капацитетот ќе се зголемува како што електронскиот систем целосно ќе се прилагодува. Оваа мерка доаѓа како одговор на строгите контроли на Шенген системот за влез/излез (EES), кој ги ограничува возачите од трети земји на престој од најмногу 90 дена во период од 180 дена. Со долгорочната виза, ова ограничување се надминува додека возачите транзитираат или работат во Хрватска, која е првата земја-членка на ЕУ која направи ваков чекор преку измени во својот Закон за странци за да им помогне на превозниците од регионот.
Покрај Хрватска, Македонија веќе има потпишано слични билатерални договори и со Романија и Швајцарија, а во тек се преговори за исти вакви решенија со Германија, Австрија, Унгарија и Словенија. Биљана Муратовска од здружението „Макам-транс“ изјави дека во отсуство на единствено решение на ниво на Европската Унија, прашањето ќе мора да се решава билатерално со секоја земја од шенген-зоната. Министерот за транспорт и врски Александар Николоски неделава најави дека наскоро ваков договор да се потпише и со Австрија.