Нето наплатата на даноците и социјалните придонеси, од почетокот на годината до крајот на октомври достигна 3 милијарди и 600 милиони евра, тоа е за околу 260 милиони евра повеќе отколку лани, изјави денеска директорката на УЈП, Елена Петрова, на одбележувањето на Денот на даночните работници, што се одржа во Клубот на пратеници.
- Во првите десет месеци, имаме раст на даночната нето наплата од над 6%, а кај социјалните придонеси – речиси 10%. Што ни кажуваат овие бројки? Тие ни го кажуваат најважното: економијата расте, активноста се зголемува, а со тоа растат и приходите. Тоа е резултат не само на поефикасната работа на УЈП, туку и на поголемата дисциплина и одговорност кај обврзниците, рече таа пред присутните.
Системот е стабилен, нагласи, мерките даваат резултат.
- И заедно ги движиме приходите кон раст и стабилност, децидна беше таа.
Според Петрова, добрата вест е дека трендовите во даночната дисциплина, годинава се позитивни.
- Се зголемува навременото поднесување на даночните пријави – првиот предуслов за данокот воопшто да стане наплатлив. Се зголемува и навременото плаќање на обврските, што е основата на стабилниот систем, потенцираше Петрова.
Таа рече дека даночната свест кај обврзниците расте.
- Во фискалната едукација на млади воведовме нови содржини, дигитален квиз и за првпат, едукација во основните училишта. Затоа што даноците не се само бројки. Даночната свест се гради уште од најрана возраст – преку разбирање, знаење и вредности, додаде Петрова.
Таа информираше дека до септември, преку контроли утврдиле 64 милиони евра дополнителен данок – пораст од над 70 отсто во однос на истиот период, минатата година. Петрова нагласи и дека УЈП ќе продолжи доследно да го применува законот, затоа што, истакна, почитувањето на правилата е основата на правичниот даночен систем.
- Кога дојдов на директорската позиција, пред една година и четири месеци, наследивме проекти и иницијативи кои со години стоеја „во фиока“, без реален напредок. Денес ситуацијата е поинаква. Конечно има трајни решенија на повидок, подвлече Петрова.
Притоа соопшти дека во тек е финалната фаза на подготовка на техничките спецификации за „е-УЈП“ – нов интегриран даночен систем со редизајнирани процеси.
- За даночните обврзници тоа ќе значи подобрена стабилност, подобро корисничко искуство и побрзи услуги, а за УЈП – поефикасни процеси, подобра интеграција на податоците, посилен аналитички капацитет и понапредно управување со ризици, појасни Петрова.
И системот за е-фактура е во напредна фаза – софтверското решение е скоро готово, информираше директорката на УЈП, а како што најави, за неполни два месеца започнува фазата на тестирање. За надминување на критичните точки и за јакнење на безбедноста на податоците и инфраструктурата, како што рече таа, оваа година биле реализирани или се во тек на реализација на склучен договор капитални инвестиции во износ од 2 милиони и 600 илјади евра.
- Деновиве заврши постапката за јавна набавка на современа опрема, најголемата поединечна инвестиција во историјата на УЈП во вредност од 1 милион и 800 илјади евра. За првпат се набавува опрема за секундарна локација и за највисоко ниво на безбедност на целокупната ИТ инфраструктура на УЈП, додаде Петрова.