Вицепремиерот и министер за транспорт Александар Николоски очекува годинава активностите на автопатите што ги гради „Бехтел и Енка“ да бидат поголеми за 70 проценти во однос на минатата година, кога се зголемиле за 90 отсто во споредба со годината пред тоа.
„Сега, со оглед на тоа дека завршните сметки се готови, можете да видите дека Бехтел има 90 проценти раст кога ќе ги споредите 2024 со 2025 година, што значи дека она што го кажуваме во јавност, дека ние им ги отворивме фронтовите за работа и им ги овозможивме сите услови да работат, се покажува на дело, а оваа година очекувам дека ќе имаат некаде 70 отсто раст, во споредба со минатата. Значи, проектот расте, како што треба да расте, се обидуваме да ги надминеме слабостите од минатото. Ние наследивме проект кој што имаше 0 отсто експропријација, нула дислокација на водови и каде што освен потпишување на договори немаше никакви активности на терен“, изјави Николоски во интервјуто за поткастот „Ноќно студио“.
Потпретседателот на Владата наведе дека уште во првите четири месеци годинава се реализирани 74 проценти од од средствата за капитални инвестиции во Министерството за транспорт.