На 14-ти март во 12 часот и пет минути од пред Работничкиот дом го започнуваме новиот голем работнички протест за зголемување на вашите плати“, порача Слободан Трендафилов, претседател на Сојуз на синдикатите на Македонија. Тој ги повика работниците да се приклучат на протестот и да се борат за повисоки плати.
- „За вашите плати треба да излезете заедно со нас да се борите затоа што другите нема да се борат. Тие сметаат дека ви ја даваат платата која вие ја заработувате, но вие ја заработувате вашата плата со вашата пот и со вашата мака“, наведува Трендафилов.
Според него, зголемувањето на минималната плата за 1.667 денари не е доволно во услови на раст на трошоците за живот.
- „Сметаме дека 1.667 денари усогласување само на минималната плата е недоволно во овие услови во кои живееме затоа што трошоците за живот секојдневно растат, а особено заради тоа што вредноста на синдикалната минимална кошница за само два месеци е зголемена за 2.000 денари“, вели Трендафилов.
Тој ги повика и членовите на другите синдикати да се приклучат на протестот.
- „Членовите на Сојузот на синдикатите на Македонија, работниците, членовите и на другите синдикати чии лидери не се борат за вашите плати да ни се придружите во сабота во 12 часот и пет минути од пред Работничкиот дом“, порача Трендафилов.
Трендафилов посочи и податоци од Управата за јавни приходи според кои значителен број работници живеат со ниски примања.
- „Дека платите во Македонија се мизерни покажуваат и податоците на Управата за јавни приходи кои покажуваат дека 160.000 работници живеат со плата под прагот на сиромаштијата“, наведува тој.
На крајот, претседателот на ССМ порача дека работниците треба да излезат и заеднички да се борат за подобри услови.
- „Сметаме дека треба да излезете заедно со нас… ако не ние сега, тогаш кој и кога?!“, се наведува во објавата.