Вицепремиерот и министер за транспорт Александар Николовски уверува дека Гостивар ќе стане центар со автопатско и железничко поврзување со тековните проекти за автопатите во изградба Тетово-Гостивар и Гостивар-Букојчани, за новата делница Букојчани-Кичево и најавената рехабилитација на пругата Скопје-Кичево. Ветува специјална програма за поддршка на оваа општина по локалните избори, откако преку двата повика на Владата за проектите со коишто аплицрала биле одвоени девет милиони евра.
- Имаме сериозна поддршка за општина Гостивар, во првиот повик што се реализираше минатата година вкупната поддршка е 160 милиони денари, а дел од тоа е и за ул. „Мара Угринова“ на која се работи, а во вториот повик кој заврши пред распишување на изборите имаме 39 проекти и поддршка од 380 милиони денари, или заедно 540 милиони денари, над девет милиони евра како директна поддршка на општина, изјави Николоски.
Вицепремиерот Николоски најави дека по завршувањето на изборите и според него извесната победа на кандидатот за градоначалник на Гостивар на Влен и коалициски партнер кој има поддршка од ВМРО-ДПМНЕ и каолицијата, за општина Гостивар ќе има специјална програма преку Министерството за транспорт.
- Подготвените проекти ќе ги реализираме веднаш. Тоа ќе зависи од подготвеноста на општината, а заеднички ќе работиме на подготовка на нови проекти што потоа би ги реализирале, посочи Николоски.
Исткна дека кога ја презеле власта наследиле само потпишан договор и непочнати работи на автопатските делници Тетово-Гостивар и Гостивар-Букојчани, но оти по преземените активности сега на двата патни правца се работи интензивно.
- Експропријацијата е скоро завршена, сега се работи на дислокација на водови и отстранување на одредени објекти кои се на трасата. Дополнително на тоа, Гостивар-Букојчани е најтежок инженерски потфат, од 32 километри 17 се пробиени. Во март ќе почне да се гради и од делот од Букојчани кон Гостивар, првпат во Македонија, ќе се гради автопат од две страни и да се спои практично на средина, рече Николоски.
Тој потврди дека на јавниот повик за избор на изведувач на автопатот Букојчани-Кичево има три понуди, а следува евалуација и избор на најдобрата.
- Очекувам во март да имаме вовед во работа. Ако на тоа надоврземе дека на автопатот Кичево-Охрид веќе пуштивме 34 километри, а активно работиме на пуштање и на останатите тоа би значело дека некаде крајот на 2028 почеток на 2029 Гостивар навистина ќе стане центар затоа што ќе има комплетно автопатско поврзување на Коридор 8 од една страна и од друга странаод Охрид преку Кичево, Струга, Граничниот премин Ќафасан и спојот со Албанија, што очекувам дека многу ќе помогне во развојот на економијата и трговијата, изјави Николоски.
- Владата веќе усвои грант од ЕУ за изработка на предфизибилити студија, физибилити и еколошка студија и проектна документација за целосна рехабилитација, сигнализација и електрификација на пругата којашто оди од Скопје преку Јегуновце, Тетово, Гостивар до Кичево. Според барањата на ЕУ, за 18 месеци документацијата треба да се заврши и се надевам дека во 2027 година да биде избран изведувач кој би работел, а во 2029 година да заврши проектот, возовите да се движат со 120 километри на час, што значи дека за 40 минути ќе се патува од Гостивар до Скопје, а од Тетово до Скопје за 20. Тоа целосно ќе ја промени комуикацијата и начинот на живот во овој дел од државата што ќе значи многу повеќе луѓе да останат во градот, да ја видат тука својата иднина и да се развива бизнис и да има поурбан живот кој ќе значи подобра иднина за сите, изјави Николоски.
Како што оцени, комуникацијата и начинот на живот во Гостивар ќе се промени и со проектот за рехабилитација на пругата Скопје-Кичево. Со активностите што треба да завршат до 2029 година од Скопје до Гостивар со воз ќе се патува за 40 минути.