Електричари, водоинсталатери, заварувачи, касапи, кондураџии саатчии златари – ова се дел од занаетите кои се повеќе стануваат дафицитарни во Македонија, а за жал некои и изумираат. Ситуацијата во занаетчиството е се полоша, но охрабрувачки е што се повеќе средношколци наместо факултет избираат стручни училишта и занаети што носат сигурна работа и добра заработка – велат од Занаетчиската комора во Скопје.
Министерката за образование Весна Јаневска вели дека недостигот на занаети треба да не загрижи, но добрата вест е што младите полека сфаќаат дека занаетот повторно станува вреден и ценет. Според неа, дополнителен придонес за стручен кадат во Македонија има и дуалното образование.
Во време кога Македонија се соочува со сериозен недостиг од стручен кадар, денеска и утре во Автосообраќајниот училиштен центар „Боро Петрушевски“ се одржува Националниот натпревар на вештини 2026. На едно место, 64 средношколци од целата држава ќе ги покажат своите знаења и практични вештини во 15 различни занаети од автомеханичари и електричари, до пекари, фризери и заварувачи. Организаторите велат дека целта е младите да се мотивираат да избираат стручни професии кои денес носат сигурна работа и се клучни за развојот на економијата.