Ердал Лушо од Струга тргна во единствена и смела мисија – сам да го преплови Атлантскиот океан со едрилица што целосно ја изработил со свои раце.
Цели 16 месеци тој ја градел својата едрилица наречена „Пиксел“. Лушо е единствениот учесник од Македонија и еден од само осумтемина натпреварувачи во светот кои се квалификувале за оваа екстремна прекуокеанска регата.
Според строгите прописи, секој натпреварувач мора самостојно да ја конструира својата едрилица, без каква било индустриска поддршка.
Трката стартува од Португалија, а крајната дестинација се Карибите – растојание од илјадници километри што треба да се помине за околу 40 дена, исклучиво со помош на ветерот и прецизна навигација.
Во моментов, Лушо престојува во Португалија. Стартот, планиран за 11 ноември, е одложен поради неповолни временски услови.
„По топлиот пречек во Лисабон, тргнавме кон Сагреш, каде што е стартната точка на трката. Поради невремето се засолнивме во Портимао и таму ќе останеме неколку дена за дополнителни подготовки“, сподели тој на својот Инстаграм-профил.
И покрај неколкуте технички предизвици, Лушо уверува дека и тој и „Пиксел“ се целосно подготвени за големата авантура – патување што ќе го впише во историјата како првиот Македонец кој самостојно се впуштил во препловување на Атлантскиот океан.