Синоќа во 20:50 часот на преминот Калотина на бугарско-српската граница е приведен 52-годишен македонски државјанин за обид за шверц на огромно количество цигари, соопшти Министерството за внатрешни работи на Бугарија.
Возачот на товарен микробус со швајцарски регистарски таблички на влез од Србија во Бугарија пријавил дека превезува ламинат и маса од Швајцарија, но по проверката на товарниот дел од микробусот бугарските цариници откриле дека пакетите содржат само горен и долен лист од ламинат. Останатите штици биле изрежани и во формираната празнина се откриени голема количина цигари со македонски акцизни бандероли и со бандероли „дјути фри“.
Во микробусот е најдена и маса по чие разглобување во нејзината основа исто така се откриени големи количини цигари.
Вкупното количество на шверцуваните цигари е 120.660 парчиња.