Повеќе бугарски политичари се среќни за поразот на Орбан во Унгарија затоа што мислат дека сега Македонија ќе нема заштита во ЕУ и брзо ќе ги прифати бугарските барања.
Европратеникот Андреј Ковачев упатува срдечни честитки за убедливата победа на „Тиса“ во Унгарија која ја доживува како крај на блискоста меѓу Скопје и Будимпешта.
Тој се надева дека Маѓар ќе запре со поддршката за наводни антибугарски политики во Македонија.
,,Ова е силен знак за промена – не само за Унгарија, туку и за Европа и светот. Одлични вести и за Бугарија!
Искрено се надевам дека Унгарија сега ќе ја преиспита својата политика во поддршка на антибугарската реторика и дејствија на Скопје, кои се поддржувани со години, вклучително и преку значителни финансиски средства за пропаганда против Бугарија. Денешното гласање покажува дека унгарските граѓани избираат поинаков пат – патот на демократијата, европските вредности и добрососедството”, пишува Ковачев.
Ковачев кој е член на партијата ГЕРБ на Бојко Борисов упатува посебни честитки до Петер Маѓар и „Тиса“, како и до колегите од групата на ЕНП во ЕП каде членува и ВМРО-ДПМНЕ.