Пожар избувнал вчера претпладне во Државното средно стручно училиште „Моша Пијаде“ во Тетово, при што шестмина вработени се здобиле со проблеми поради вдишување чад.
Според информациите од Министерството за внатрешни работи, пријавата била поднесена во СВР Тетово околу 9:50 часот. Пожарот настанал во една од кабините во машкиот тоалет.
Вработените во училиштето брзо го локализирале и го изгаснале пожарот со помош на противпожарни апарати и хидрантска мрежа, со што било спречено негово понатамошно ширење.
При интервенцијата, шестмина вработени – Н.Р., И.П., М.С., А.З., Б.К. и Г.М. – биле изложени на чад и биле пренесени во Клиничкиот центар во Тетово, каде им била укажана лекарска помош.
На местото на настанот увид извршила екипа од СВР Тетово во координација со јавен обвинител. Се работи на утврдување на причините за избувнувањето на пожарот.