„Дали слушнавте кој победи, зошто да се повлечам од политиката? Дали ги сакате резултатите, одете во ДИК. Ако може да видите дали за 25 години има еден пораз на Ахмети тогаш ќе се повлечам. Еве ги резултатите, 25 години сме победиле, не само последниве 3 циклуси. Апсолутно не е пораз во Тетово и Струга, на 2 ноември играта почнува од 0:0. За Чаир и Сарај – во битки има и порази“, рече Ахмети меѓу двата изборни круга, потсетува Фокус.
Иако ДУИ освои градоначалници во само четири мали општини со мнозинско албанско население, сепак, партискиот лидер Лидерот на ДУИ по првиот изборен круг оцени дека коалицијата Алијанса за национална интеграција, предводена од ДУИ, победила на локалните избори, бидејќи освоила над 20 илјади гласови повеќе на советничките листи во споредба со ВРЕДИ
Но, во вториот круг локални , коалицијата НАИ предводена од ДУИ освои градоначалнички места само во Липково, Пласница, Чашка и Студеничани, што, меѓу другото, предизвика далеку поумерена реакција на Ахмети по вториот изборен круг.
„…Сепак, губењето на неколку клучни позиции на општинско ниво ќе послужи како повик за длабинска анализа, за обновување на стратегиите и корекција на евентуалните недостатоци за да им се понуди повеќе и подобро на граѓаните“ вели Ахмети.
Тој најави промени и реформи во рамки на ДУИ, чии насоки ќе се утврдат на претстојниот партиски Конгрес, кој треба да се одржи на 20-ти декември.
Според високи партиски извори, Ахмети ќе остане на чело на ДУИ уште еден мандат, меѓутоа ќе има големи кадровски и друг тип на промени во целокупната партиска структура и организација. За таа цел, на претстојниот Конгрес на ДУИ треба да се промени партискиот Статут, со цел да се регулира изборот на општински раководства и да се отвори простор за млади луѓе.
„Ахмети сам би се повлекол веднаш доколку дозволува ситуацијата, но моментално ситуацијата не е таква. Тој ќе остане уште еден мандат на чело на партијата, но ќе се случат многу други промени. Меѓу најважните ќе биде промена на Статутот бидејќи се покажа дека изборот на раководства во општинските организации според принципот еден член еден глас е непродуктивен. Така беа изгласани многу партиски авторитети, но младите беа маргинализирани и тоа сега ќе се поправи“ – вели висок партиски функционер.
Упатените за Фокус посочуваат дека во партијата има свесност дека има лоша перцепција кон многу функционери, кои долги години држат високи партиски и државни функции.