Министерот за здравство, Азир Алиу, најави значајна промена во постапката за обезбедување лекови за пациенти со ретки болести – за првпат во државата ќе се отвори тендерска постапка за три години, наместо годишно.
Според министерот, досегашниот модел предизвикувал задоцнувања од неколку недели до месеци, бидејќи ретките болести се дијагностицираат во се поголем број поради подобрена технологија и рана детекција, а потребите се тешко предвидливи – особено кај млади пациенти каде дозите зависат од тежината и активноста.
„Секоја година оваа категорија граѓани со ретка болест со задоцнување ги добиваа лековите или за жал чекаа по недела или месец дена. Зошто? Затоа што ретките болести се почести и кај нас и во светот, заради технологијата, методологијата на детектирање во рана фаза“, појасни Алиу.
Новиот пристап предвидува отворање на постапка за тригодишно снабдување, со доволна резерва количини. Ако во некој момент се потроши повеќе од планираното, државата ќе има време да отвори дополнителна постапка без пациентите да чекаат ниту ден.
„Методологијата се смени и сега веќе отвораме постапка за три години, која во случај ако се трошат повеќе од количините кои ќе ги имаме како држава, ние да имаме време да отвориме друга постапка, а се со цел граѓаните да ги добиваат тие лекови на време. Да бидат спокојни и граѓаните и родителите дека државата и Министерството нема да дозволат ниеден од нашите пациенти со ретки болести да чекаат ниту еден ден за овие лекови“, потенцира министерот.
Оваа промена е дел од пошироките напори за подобрување на пристапот до терапија за ретки болести, каде што досегашните годишни тендери често доведуваа до прекини во терапијата.