Дека Анталија е „кралица“ на летните одмори и морските доживувања, е одамна прифатен факт. Но, оваа туристичка престолнина на Туркије, која се најде и меѓу Топ 10 дестинации според рангирањето на Euromonitor International Arrivals 2025, сѐ повеќе се наметнува како привлечно место и за зимските и пролетните месеци. Со концептот туризам преку цела година, семејствата имаат на располагање бројни тематски паркови, кои нудат забава и авантури за сите генерации.
Најголемиот забавен ресорт во Туркије е „The Land of Legends“, сместен во Белек, кој најмногу се препорачува за туристите желни за адреналин. Една од атракциите таму е познатиот ролеркостер, висок 62 метри и со брзина до 115 километри на час, со големи превои и кружни свиоци. Во ресортот се наоѓа и „Аква ленд“, водна атракција со бројни водени тобогани и лизгалки, од побрзи и екстремни, до поблаги. Базените со бранови, како и детските зони за релаксирање и игра, го прават ова место поволно за семејства, но и за поединечни и групни посети. Сѐ повеќе популарен станува и тематскиот парк инспириран од познатите цртани ликови на телевизиската мрежа Nickelodeon, кој нуди возења, игри и шоу програми, како и посебната детска тематска зона „Маша и мечокот“, собезбедни шарени детски атракции и можност за средби и фотографирање со ликовите. И сместувањето е посебно – во специјални тематски апартмани и хотели.
Една поинаква културна димензија нуди паркот Докума, лоциран на местото на поранешна текстилна фабрика во општината Кепез, кое сега е полно со музеи, меѓу кои и Музејот на играчки, како и Музејот на автомобили. Особено интересен е Паркот на минијатурите на отворено, каде на површина од 10.000 квадратни метри се прикажани малечки копии на познати згради, споменици и други знаменитости од цела Туркије, во размер од 1:25.
Голема атракција е и аквариумот во Анталија, еден од најголемите комплекси од ваков вид во светот. Располага со над 40 тематски резервоари и тунел долг 131 метар, каде над посетителите пливаат ајкули, ражи и јата риби, создавајќичувство како да се чекори по морското дно. Во комплексот се сместени и тропскиот парк за диви животни, како и затворена снежна зона со вештачки снег и ледени скулптури, каде температурата е -5°C, дури и кога надвор е над 40°C. Во паркот се наоѓа и киното „Oceanride XD“, каде може да се доживее виртуелно патување низ океанот.
Во Кепез Мацера Ормани пак, има можности и за активности на отворено, на пример: искачување по јажиња, возење по зип-лајн или забава со пејнтбол. За посетителите се препорачува и луна-паркот Актур во Коњаалти, со луда железница, гондоли, куќа на стравот, атракции за деца и карневалски игри. Интересен за посета е и „Hip-Notics Cable Ski Park“, со три вештачки езера, кој работи во текот на цела година. Паркот располага со главен кабел долг 730 метри, пет столбови и двојна кула за тренинг, погодни за почетници, но и за искусни вејкбордери.
За февруари годинава се планира отворање на „Butterfly World Antalya“, на 10.000 квадратни метри. Местото е замислено како мирна тропска оаза, со водопади, бујна вегетација, езерца, риби, птици, како и илјадници пеперутки, а ќе има и амфитеатар на отворено, за еколошка едукација и за сезонски настани.