Со градежна механизација се затрупува локацијата каде од саботата рано попладнето избувна пожар во погоните на компанијата „Ф-Групација“, која се занимава со електронски отпад. Ваквиот чекор како најбрз начин, за да се гасне дел по дел од опожарената локација, е преземен, откако вечерва се распламте огнот и се заканува да зафати уште поголема површина. Ова го објави вечерва новинската агенција Нетпрес.
Натаму агенцијата наведува: Истовремено се носи и ситен песок за гаснење. Главната цел, покрај гаснењето, е пожарот да не се рашири. На местото се присутни повеќе противпожарни бригади, чии припадници дејствуваат со заштитна опрема и поради горењето на пластични материи, со целосна опрема и возила за гаснење. Во моментов поради паѓање на вечерта веќе не дејствуваат хеликоптерите и „воздушните трактори“.
Покрај присутни полициски службеници се и градоначалникот на Гази Баба Бобан Стефковски, на Кисела Вода Орце Ѓорѓиевски и на Аеродром Дејан Миткоски.