Жална вест во Македонија. Згасна уште еден млад живот. Двомесечно бебе починало синоќа на детското одделение во Општата болница во Кавадарци по дводневна хоспитализација во болницата. Бебето на 12 јануари било примено на Одделот за педијатрија поради обилно повраќање по хранење. Од болницата во Кавадарци велат дека додека било хоспитализирано, бебето имало уредни лабораториски анализи и параметри. Два дена подоцна, по итен повик од мајката дека детето не може да дише, бил повикан педијатар и анестезиолог кои почнале процес на реанимација.
- Започната е реанимација со соодветна терапија која траела околу 35 минути, но за жал без успех. По констатирањето на смртта, согласно законските процедури, известени се надлежните служби – Министерството за внатрешни работи и Јавното обвинителство. Земени се изјави од родителите и од дежурниот медицински персонал, по што телото на доенчето е предадено на обдукција, со цел утврдување на точната причина за смртта, велат од Општа болница Кавадарци.
Министерството за здравство соопшти дека наложило Државниот санитарен и здравствен инспекторат да изврши инспекциски надзор во Општата болница во Кавадарци во врска со случајот со починатото новороденче. Од болницата денеска соопштија дека бебето со иницијали У. М., на возраст од два месеца, кај нив било примено поради обилно повраќање по хранење.
СВР Велес претходно соопшти дека синоќа во ОВР Кавадарци е пријавено дека околу 21.35 часот на детското одделение во Општа болница во Кавадарци починало бебе на возраст од два месеца.
- Според пријавеното, бебето било хоспитализирано на 12.1.2026, но починало и покрај дадената медицинска помош и направената реанимација. Лекар констатирал смрт, а по насоки на јавен обвинител, телото е дадено на обдукција – соопшти СВР Велес.