„Благодарение на двојното мнозинство – бадинтер денес во Собранието не помина обидот за измена на Изборниот законик, направен без консултација со ОБСЕ-ОДИХР и без вклучување на пратениците од Националната алијанса за интеграција во отворен и сеопфатен процес.“ – напиша пратеникот и координатор на пратеничката група на ДУИ во Собранието на Република Македонија Блерим Беџети на својот фејсбук-профил. Наспроти ова тврдење на Блерим Беџети, пратеникот и координаторот на пратеничката група на ВМРО ДПМНЕ Никола Мицевски, исто така, преку општествената мрежа обвини дека ДУИ не сакаат независни кандидати на локалните избори и оти ним им пречи и прагот од 0,5 отсто за потребни потписи.
Блерим Беџети во својата објава на фејсбук натаму наведе: „Тоа што не помина обидот за измена на Изборниот законик е победа за демократските принципи и почитувањето на гласот на граѓаните, бидејќи законите што директно влијаат на иднината на земјата и изборните процеси мора да се изготвуваат со отвореност, консензус и почитување на меѓународните стандарди. Напорите на партиите од Вреди, кои денес ја држат власта без етнички легитимитет во противалбанската влада, не можат да ги загрозат правата и еднаквата застапеност на Албанците.“
„Ќе останеме решени дека секоја законска промена треба да биде функција на демократијата, еднаквоста и правичната застапеност на сите заедници во земјата.“ – посочи Блерим Беџети.