Од скромен берберски дуќан до место каде што се раѓаат насмевки и се сплотуваат срца – така се опишува салонот на берберот Али Февзи од скопската населба Аеродром. Во духот на новогодишните празници, Али веќе со години влегува во улогата на Дедо Мраз и им ја носи магијата на Новата година на децата од социјално загрозени семејства.
Со новогодишни пакетчиња, топол збор и искрена грижа, им овозможува барем за миг да ја почувствуваат радоста што празниците ја носат. Годинава, благодарение на донации од хумани граѓани и општествено одговорни компании, обезбедени се околу 500 новогодишни пакетчиња.
Али Февзи вели дека оваа хуманитарна мисија ја започнал со јасна порака – радоста не смее да биде привилегија.
„Знам дека сега пред Нова Година е со делење на пакетчиња. До сега навистина многу хумани луѓе се пријавија. Земаат од плата и пензија даваат пари, а моќните луѓе ги чекаме – знам дека до крајот на годината ќе покажат хуманост и слух, ќе донираат барем по едно пакетче за децата затоа што видеовте и самите дека се пред дуќан. Има ранлива категорија на деца што не молат за пакетче. Денеска поделивме заедно со гопоѓа Елена и други хумани луѓе што се пријавија како волонтери скоро 400-500 пакетчиња пред дуќанот, тоа беше денеска гунгула“ вели Али Февзи, бербер
Берберот апелира ваквите иницијативи да прераснат во традиција и да се прошират низ целата земја. Според него, секој може да придонесе – без разлика дали донацијата е мала или голема, затоа што секоја помош значи искра радост во детските очи.
„Имаше госпоѓа Соња која донираше пелени и влажни марамчиња. Имавме и тримесечно бебе – не можеше да остане дома, дојде со родителите. Тоа многу ме воодушеви. Од 2020 година наваму, од 300 пакетчиња стигнавме до 2.000. Досега имаме донирано над 1.000 пакетчиња, посетивме и деца со попреченост, каде што однесовме повеќе од 100 пакетчиња“ вели Али Февзи, бербер
Во акцијата „новогодишна магија“ десна рака на Али Февзи е Елена Андреевска, соработка со него започнала сосема случајно, а прераснала во силно хуманитарно партнерство. Нејзиното животно мото е дека хуманоста е заразна, во најпозитивната смисла на зборот.
„Имав една драга случка, така да кажам, кога одевме кон дневен центар и тие деца на кои им ондесовме пакетчиња, трчаа по мене и ми даваат некои работи кои што ги имале направено и нацртано. И толку беа благодарни за тоа што ние дојдовме таму, беа толку среќни. И кога им кажав дека пак ќе дојдеме да им донесеме она што им е потребно, тие почнаа да пејат, да рецитират песнички, и ги земав цртежите што ми ги подарија и ги ставив дома, онака ги закачив како најголема благодарница, како еден голем успех кој до сега го имам направено, тоа ми е онака како медал“вели Елена Андреевска, помошничка од „Биди Али“
Берберскиот дуќан на Али Февзи крие и богата семејна историја. Занаетот го наследил од неговите татко и дедо, продолжувајќи традиција долга повеќе децении. Денес, освен како мајстор на ножиците и машинката, Али Февзи е препознатлив и како симбол на хуманост – човек кој од својот дуќан создаде место каде што празничниот дух живее во текот на целата година.