Народната банка внимателно ги следи актуелните трговски и геополитички тензии, особено по ескалацијата на кризата на Блискиот Исток и блокадата на Ормутскиот теснец, кои значително ги зголемија глобалните ризици, предизвикувајќи нов шок на страната на понудата и брз раст на цените на енергијата.
Ова беше истакнато на средбата меѓу гувернерот на Народната банка, д-р Трајко Славески, и директорката на Светската банка за Западен Балкан, Шјиаочјинг Ју.
Гувернерот Славески нагласи дека Народната банка, како носител на монетарната политика, постојано ги оценува големината, природата и влијанието на надворешните шокови врз домашната економија.
Тој истакна дека за градење отпорност се неопходни кредибилна монетарна политика и ефикасни макропрудентни мерки, со цел да се зачува макроекономската и финансиската стабилност, како и стабилноста на банкарскиот систем.
„Народната банка ја покажа својата способност за решително дејствување, придонесувајќи за намалување на инфлацијата и одржување на финансиската стабилност. Соочени со нов бран на неизвесност, нашата цел и натаму останува обезбедување на стабилност во услови на динамични светски промени“, рече гувернерот Славески.
На средбата беше нагласено значењето на партнерството и соработката меѓу Народната банка и Светската банка, особено во рамките на проектот за модернизација на платните системи во земјите од Западен Балкан.
Директорката Шјиаочјинг Ју изрази силна поддршка за напорите на Народната банка за успешно зачленување на Македонија во Единствената област за плаќања во евра (SEPA), како и за вклучување на сите банки во шемата за кредитни трансфери во рамките на SEPA.
„Пристапувањето на Македонија кон SEPA во 2025 година веќе дава конкретни резултати. Трошоците за трансфер се намалија за 80 отсто, а надоместоците за трансакции од 20.000 евра се намалија од 0,33 отсто на 0,04 отсто. Во поширока смисла, се очекува дека со пристапувањето на земјите од Западен Балкан кон SEPA, тие ќе остварат заштеда од околу 0,6 отсто од регионалниот БДП, односно околу една милијарда евра“, истакна директорката на Светската банка за Западен Балкан.
На средбата се разговараше и за продолжување на поддршката од Светската банка за воведување на систем за брзи плаќања за домашни и регионални трансакции, како и за напредокот на повеќе проекти за јакнење на финансиската стабилност.
Посебно беше истакната корисноста од студијата за одржливост на корпоративниот сектор, спроведена во 2024 и 2025 година со поддршка на Светската банка, која ќе придонесе за подобри системски анализи и супервизорски оцени на Народната банка.