Наспроти оптимистичките најави дека Црна Гора ќе влезе во Европската унија до 2028 година, српскиот претседател Александар Вучиќ не е оптимист дека кој било од Западен Балкан ќе го стори тоа во наредните неколку години, сметајќи го за бесмислено влегувањето на неговата земја без соседите Македонија и Босна и Херцеговина.
„Не сум оптимист за брзо членство во ЕУ за никого од нас. Ме сметаа за песимист и претпазлив човек, но очигледно е дека бев во право. Не мислам дека ЕУ ќе може да донесува одлуки за проширување во следните неколку години, но тоа не значи дека не треба брзо да продолжиме по нашиот европски пат – да спроведуваме реформи“, нагласи Вучиќ на отворањето на дводневната Конференција на претседатели на парламенти на земјите-кандидати за членство во ЕУ, која почна денеска во Белград.