Енергетската безбедност денес е заедничка одговорност на целиот регион и може да се постигне само преку поврзана инфраструктура, усогласени политики и заеднички инвестиции, порача министерката за енергетика, рударство и минерални суровини, Сања Божиновска.
Нејзиното обраќање беше на Неформалниот министерски совет на Енергетската заедница во Приштина, на кој учествуваа министри од Западен Балкан, претставници на Европската комисија и Секретаријатот на Енергетската заедница.
Министерката истакна дека визијата на Македонија е изградба на целосно поврзан регионален енергетски систем кој ќе ги обедини електроенергетските, гасните и идните водородни мрежи. Таа додаде дека земјата активно работи на интеграција во европскиот енергетски пазар.
Божиновска информираше дека гасниот интерконектор со Грција треба да биде завршен до 2027 година, додека интерконекторот со Србија е во фаза на подготовка и се очекува да биде реализиран околу 2028 година. Со овие проекти ќе се отворат нови извори на снабдување, вклучително и со течен природен гас преку Грција.
На состанокот беше поздравен напредокот на Македонија во усогласувањето со европското енергетско законодавство, како и пуштањето во функција на интрадневниот пазар на електрична енергија.
Министерката порача дека иднината на регионот зависи од заедничко делување, а интеграцијата во европскиот енергетски систем ќе донесе поголема енергетска сигурност, конкурентност и привлекување на инвестиции. Посебен акцент беше ставен на потребата од диверзификација на изворите на снабдување, зајакнување на интерконекциите и зголемување на домашното производство на енергија.