Илјадници електрични столбови во Македонија, Бугарија и Турција ќе бидат обезбедени со цел да се заштитат глобално заштитените видови птици.
Далноводите ќе бидат опремени со рефлектори за да се спречи јата да ги удираат жиците, а ефектот од заштитните мерки ќе се следи за да може ова да се имплементира и во други земји.
Мерката ќе биде спроведена во текот на следните пет години како дел од меѓународен проект во рамките на програмата „Живот“ на Европската унија.
Во проектот се вклучени ЕВН Македонија, Македонското еколошко друштво (МЕД), како и бугарската „Електрораспределение Југ“ (дел од ЕВН), во соработка со Бугарското друштво за заштита на птиците а од Турција четири компании за дистрибуција на електрична енергија, заедно со Турското еколошко друштво (ДОГА).
Вкупниот буџет на проектот надминува 11,3 милиони евра. Од нив, ЕК ќе финансира речиси 8,5 милиони, а преостанатите средства ги обезбедуваат партнерите во проектот.
Целта на проектот е да се поддржи зачувувањето на глобално загрозените царски орел и египетски мршојадец преку модернизација и обезбедување на енергетските капацитети во земјите учеснички.
Во Македонија и во Турција ќе бидат опфатени 48 важни места за птиците и за биодиверзитетот, а само во Македонија ќе бидат обезбедени 3.000 столбови и ќе бидат инсталирани 1.000 пренасочувачи.
Планирано е пренасочувачите да се инсталираат со три професионални дронови, а четвртиот ќе се користи за теренски истражувања и анализа на податоци со помош на специјализиран софтвер. Исто така, планирано е да се купи специјализирана опрема – две воздушни платформи за мрежни активности.
Иако проектот е фокусиран на популациите на царскиот орел и на египетскиот мршојадец, активностите ќе се одразат и на многу други видови – практично сите птици што се размножуваат, мигрираат или зимуваат во проектните области.