„Особено ми е драго што денеска во Охрид бев домаќинка на мојот драг пријател, претседателот на Република Албанија Бајрам Бегај, кој е во работна посета на земјава. Обајцата изразивме задоволство од воспоставеното пријателство и добрите односи меѓу двете земји. Се согласивме дека регионалното инфраструктурно поврзување е најдобар начин за продлабочување на соработката меѓу двете земји. Меѓу клучните проекти во оваа област е Коридорот 8, што треба да биде еден од приоритетите, кои ќе овозможат полесна комуникација меѓу земјите во регионот.“ – објави претседателката на Република Македонија Гордана Силјановска-Давкова на својот официјален фејсбук-профил по денешната средба со претседателот на Албанија Бајрам Бегај во Охрид.
Во својата објава на општествената мрежа македонската претседателка Силјановска-Давкова дополни: Со колегата Бегај изразивме надеж дека како соседи може да постигнеме успех во заштита на Охридското Езеро, природата и заедничкото природно богатство. Постои можност овие активности да бидат финансирани преку европски фондови, достапни со заеднички апликации на двете земји.