Од денес ќе се овозможи сообраќајот на граѓаните и туристите кон Охрид на новиот коловоз на патниот правец Кичево-Охрид, на потегот од селото Врбјани до Охрид. Делницата е со должина од околу 40 километри и ќе има прекин кај селото Ботун. Претседателот на Владата на Република Македонија Христијан Мицкоски денеска ќе присуствува на пуштање во употреба на овој дел од автопатот Кичево-Охрид во 12 часот. Премиерот Мицкоски ќе има обраќање потоа. Останатиот дел од автопатот, според официјалните информации, би требало да заврши до крајот на 2026 година. Вкупната должина на автопатот изнесува 57 километри.
Автопатот е во состав на западниот дел од коридорот 8, на кој работи и американско-турскиот конзорциум „Бехтел и Енка“. Станува збор за делницата Тетово-Гостивар и Гостивар-Букојчани, каде што изведувачот работи засилено, следејќи ја динамиката што ја наметна Јавното претпријатие за државни патишта со решавање на прашањата околу експропријацијата на земјиштето.
За комплетирање на коридорот 8 од Скопје до Охрид е потребно да се доизгради автопатот од Кичево до Врбјани, но и делницата Букојчани-Кичево. Во врска со ова во моментов тече јавен повик за избор на изведувач. Според најавите, за делницата Требеништа-Ќафасан ќе се ревидира трасата, со оглед дека постојниот проект го загрозува заштитениот статус на Охридско Езеро и на регионот.