Ново вознемирувачко видео од физичко насилство меѓу малолетници пристигна од Куманово. На снимката се гледа како три девојки брутално го тепат едно девојче, влечејќи го за коса, удирајќи го со шлаканици и клоци, а во еден момент го фрлаат во ѕид.
Според достапните информации, инцидентот се случил пред околу еден месец, а видеото првично било објавено на „Снепчет“ со опис „кога ќе ме пцуеш, ќе јадеш и ќотек“. Жртвата вчера се обидела да го пријави случајот во полициска станица Куманово, а денеска била примена на разговор.
Од Министерството за внатрешни работи за „Слободен печат“ потврдија дека СВР Куманово, во координација со Основното јавно обвинителство, презема мерки и активности за целосно расчистување на случајот.
Ова е втората сцена на малолетничко насилство обелоденета овој месец. Претходно, во скопската населба Аеродром, беше објавено видео на кое девојче беше натерано да клекне, да се извинува и да ветува дека нема да го пријави настанот, додека беше удирано и снимано од поголема група малолетници.
Јавноста повторно реагира со вознемиреност и повици за построги мерки против насилството меѓу младите и поголема одговорност од институциите.