Уставниот суд на Република Македонија официјално започна процес на целосна дигитализација, со цел зголемување на ефикасноста, транспарентноста и пристапноста кон јавноста. Проектот беше промовиран денеска за време на билатерална средба со делегација на Уставниот суд на Република Турција, предводена од претседателот Кадир Озкаја.
На свеченото отворање на новата сала за седници, претседателот на Уставниот суд Дарко Костадиновски ја презентираше новата технолошка опрема, донирана од Турската агенција за соработка и координација (ТИКА), со техничка имплементација од Македонски Телеком. „Новите технолошки решенија ќе овозможат модерни и безбедни услови за работа, одржување хибридни состаноци со интегрирана аудио и видео конференциска опрема, симултан превод, безбедна cloud платформа со повеќекратна автентикација, алатки за онлајн соработка, снимање и автоматско транскрибирање на седници, електронско гласање, архива, аналитика и можност за пренос во живо на социјални мрежи“, рече Костадиновски.
Средбата опфати и разговори за регионални прашања, вклучително подготовките за Форумот на уставните судови од Балканот, кој ќе се одржи во ноември во Анталија, како и споделување искуства за уставно-судската контрола преку уставна жалба. Претседателот Озкаја истакна дека континуираната соработка меѓу двата суда ќе го зајакне владеењето на правото и заштитата на човековите права во регионот.
Делегацијата ќе има работен ручек со претседателот на Собранието, Африм Гаши, и ќе ги посети Меморијалниот центар „Коџаџик“, спомен-куќата на Али Риза (таткото на Мустафа Кемал Ататурк), Старата скопска чаршија, Шарената џамија во Тетово, џамијата Али Паша во Охрид и античкиот град Хераклеа Линкестис во Битола.
Уставниот суд и ТИКА имаат долгогодишна соработка, вклучително донација на компјутери и печатачи во февруари минатата година. На промоцијата присуствуваа потпретседателот на ТИКА, Махмуд Чевик, и координаторот на канцеларијата на ТИКА во Скопје, Шенса Бабајигит.