Лидерот на ЗНАМ, Максим Димитриевски, жестоко удри врз поранешните сопартијци од СДСМ по последните критики од нејзиниот претседател Венко Филипче за односите со Бугарија и за одбивањето на власта да впише Бугари во Уставот како услов за откочување на македонската евроинтеграција.
„Со право можам да кажам дека Социјалдемократскиот сојуз, некогашната државотворна партија, во континуитет 8 години наназад е предводен од крајно бугарофилско раководство, кое работи за туѓи, а не за македонски интереси“, изјави Димитриевски во интервју за ТВ Сител.
„Таа агенда започна со политиките на Зоран Заев, со она фамозно интервју на БГНЕС, каде што нè изедначи и во јазикот, и во нацијата. Дополнително, следуваше изјавата на поранешниот претседател на државата Стево Пендаровски, којшто рече дека Гоце Делчев е Бугарин, и на тоа следуваше потпишување на фамозниот Француски договор и целосна капитулација на нашата дипломатија предводена од Димитар Ковачевски, за денеска да го гледате истиот Венко Филипче, којшто во континуитет инсистира на уставни измени, а сето тоа го потврдува на крајот и неговиот член на Централниот одбор, Рубин Земон, којшто вели дека Гоце Делчев нема никаква улога во историјата на Македонија и го минимизира ликот и делото на еден од нашите најголеми револуционери во нашата понова историја“, образложи градоначалникот на Куманово.