Ангел Џамбаски, бугарски европратеник од 2014 до 2024 година, не пропушти да ја нападне Македонија по скршеното стакло на влезната врата од Амбасадата на Бугарија во Скопје.
„Додека Орбан е на власт во Унгарија, а ВМРО-ДПМНЕ во Северна Македонија, нема да има подобрување во нашите односи. Го очекувам токму спротивното – повеќе провокации и ескалација на тензиите. Подобрувањето на односите меѓу Скопјe и Софија оди само преку демонтирање на оваа антибугарска, прокремљска и србоманска власт, но тоа нема да се случи без паѓање на владата во Унгарија“, изјави Џамбаски за бугарскиот портал „Таралеж“.
„Во Република Северна Македонија постои јасно изразен антибугаризам, генериран од властите таму. Владетелите таму се обидуваат да одржуваат крајно хистерична тензија против сите манифестации на бугарската национална свест. Во Северна Македонија има најмалку 230.000 луѓе кои добиле бугарско државјанство“, додава вториот човек на вонпарламентарната партија ВМРО-БНД.
„Кога вредните згради – културни споменици во Пловдив – требаше да бидат уништени, некој скитник ќе ги запалеше. Сега, братучедот на овој скитник отиде и ја скрши вратата на нашата амбасада – повторно некое лице кое беше искористено за да ја изврши оваа провокација“, коментира Џамбаски.
Тој е категоричен дека Бугарија мора да има конзистентна политика кон Македонија, „а не таа да зависи од тоа кој е на власт, а силните личности во бугарската политика да се плашат да ги заштитат бугарските интереси во Македонија и да не ги налутат Меркел, Мерц, Макрон или кој било друг европски лидер“.