Докторка примила мито во битолската болница – Оваа информација е потврдена од Обвинителството, пренесува Прес 24 .
Од обвинителството соопштие дека ОЈО Битола и СВР Битола постапуваат за кривично дело примање поткуп од осомничена докторка, а повеќе информации се најавуваат за утре.
Претходно за случајот се огласија и од Министерството за здравство од каде упатуваат остри осуди и посочуваат дека е недозволиво коруптивно однесување во здравството.
Министерството за здравство најостро го осудува секој облик на коруптивно однесување во здравствениот систем. Во врска со случајот во ЈЗУ Клиничка болница „Др. Трифун Пановски“ – Битола, каде што денес медицинско лице е затекнато при примање поткуп, Министерството веднаш иницира постапка за утврдување на дисциплинска одговорност, согласно законските процедури. Реакцијата на Министерството е брза, принципиелна и недвосмислена, ставена во насока на заштитата на достоинството на пациентите и интегритетот на медицинските лица од јавното здравство. Граѓаните имаат право на фер и достоинствен третман. Министерството не толерира корупција и ќе ги санкционира сите прекршоци за да ја зачува довербата во здравствениот систем. Очекуваме институционална истрага и завршница од надлежните органи, со цел ефикасна борба против корупцијата. Ги повикуваме граѓаните да продолжат да пријавуваат преку веб алатката „Пријави неправилности“, додека институциите да продолжат постапуваат доследно и без селективност, велат од МЗ.