Албанскиот бизнисмен Самир Мане, основач и сопственик на „БАЛФИН груп“, во чија сопственост се трговскиот центар „Ист гејт мол“ во Скопје и синџирот продавници за електроника и на бела техника, продолжува да биде дел од листата на глобални милијардери на списанието „Форбс“, и тоа со зголемено богатство за 300 милиони долари според најновото ажурирање.
Според податоците објавени на 11 март, богатството на Мане се проценува на околу 1,8 милијарди долари, што го рангира на 2233. место во светот. Во декември 2025 година „Форбс“ го процени неговото богатство на 1,5 милијарди долари.
„БАЛФИН груп“ е инвестициски конгломерат со седиште во Тирана, кој вклучува трговски центри, синџири продавници за електроника и играчки во Западен Балкан, како и банка и луксузни проекти за недвижности во Албанија. Групацијата, исто така, има инвестиции во недвижности во САД, Канада и Австрија, а поседува и логистички паркови и приватен универзитет во Албанија.
Во сопственост на Мане во Македонија е и „Скопје Ист гејт“, голем проект со мешана намена, кој вклучува станбени, деловни и трговски содржини, кој го поседува станбениот комплекс зад „Ист гејт мол“.