Во врска со Законот за Владата координаторот на ДУИ, пратеничката Рина Ајдари, побара да прекине седницата на Собранието и овој предлог закон дополнително да се дискутира и во Комитетот за односи меѓу заедниците.
Потпретседателот на Собранието, по неколку процедурални интервенции и објаснувања, го стави предлогот на Рина Ајдари на гласање.
Иницијативата на ДУИ за прекинување на седницата беше одбиена со 65 гласови ПРОТИВ и само 14 гласа ЗА.
По ова гласање, опишувајќи го како мајоризација, пратеничката група на ДУИ заедно со пратениците Сали Мурати и Халил Снопче демонстративно ја напуштија седницата.
Интересно што пратениците Илире Даути, Зијадин Села и Елми Азири останаа на седницата и учествуваа во расправата по законот.
Иако формално овие пратеници сеуште се дел од коалицијата “Европски фронт”, сепак не го послушаа повикот на ДУИ и не ја напуштија собраниската сала.
Оваа постапка се совпаѓа со најавите на Изет Меџити дека вратата на парламентарното мнозинство е подотворена за партијата на Зијадин Села.
Седницата сеуште трае и се очекува денес во вечерните часови пратениците да гласаат за предлогот за измени во Законот за Владата во кој се предлага одложено укинување на техничката влада, после следните парламентарни избори.
Пратениците на СДСМ се во салата и расправаат за законот.