Претседателот на СДСМ, Венко Филипче, оцени дека продолжувањето на преговорите со Европската Унија зависи исклучиво од актуелната власт, за која смета дека нема вистинска намера да го продолжи евроинтегративниот процес. Тој повтори дека внесувањето на Бугарите во Уставот не претставува закана за македонскиот идентитет и побара граѓаните да добијат можност директно да се изјаснат за иднината на државата преку референдум.
Одговарајќи на новинарско прашање, Филипче порача дека премиерот Христијан Мицкоски нема право да го блокира европскиот пат на Македонија и нагласи дека власта има обврска да им овозможи на граѓаните да се изјаснат за стратешките определби на државата.
– Власта има обврска да распише референдум, затоа што нема право да го запре европскиот пат на земјата, затоа што излажаа дека ќе обезбедат подобра преговарачка позиција и никогаш не кажаа дека ќе го блокираат европскиот пат на земјата, затоа што излажаа дека ќе го вратат името, дека ќе укинуваат Преспанскиот договор, договорот за добрососедство и ништо од тоа не направија – рече Филипче.
Според него, одлуката за продолжување на преговорите е целосно во рацете на власта, која, како што вели, ги заплашува граѓаните со тврдења дека се загрозени македонскиот јазик и идентитетот.
– Дали ќе ги продолжиме преговорите зависи од власта, а од власта очигледно не сакаат. Ги плаши граѓаните дека е загрозен јазикот, идентитетот и не знам која друга идентитетска одредница на македонскиот народ, со цел да не се направи чекорот којшто не носи никаков ризик, а тоа се уставните измени. Така да, билатералните прашања со било која земја членка на Европската Унија не се никаков дел од нашата преговарачка рамка и тоа граѓаните мора да го знаат – изјави Филипче пред почетокот на конгресот на НСДП.
Тој додаде дека ВМРО-ДПМНЕ дошла на власт со ветувања кои не ги исполнила, меѓу кои и најавите за враќање на името и поништување на меѓународните договори, поради што, според него, нема легитимитет да ја држи државата надвор од европскиот процес.
На прашањето дали уставните измени ќе останат услов од Софија на патот кон Европската Унија, Филипче одговори дека билатералните прашања треба да се решаваат билатерално и не смеат да влијаат врз отворањето и затворањето на преговарачките кластери.
Лидерот на СДСМ упати и остри критики кон власта, порачувајќи дека „бандата предводена од Мицкоски ќе одговара и ќе ги враќа парите“.