Денеска се навршуваат пет месеци од кочанската трагедија, по што и овојпат граѓаните се собраа на протестен марш во чест на „ангелите“. Спомените се единствената сила што нè држи исправени. Оваа порака беше испратена на денешниот 18. „Марш на ангелите“ што се одржа во Кочани во чест на загинатите во пожарот во дискотеката „Пулс“. Воедно, денеска се навршуваат пет месеци од трагедијата која присутните ја опишаа како најтешкиот ден во нивните животи.
И по половина година, раните сè уште не зараснаа – семејствата на настраданите секојдневно ја носат болката и се сеќаваат на своите најблиски.
– „Денес се навршија пет месеци од најтешкиот ден во нашите животи. Пет месеци празнина во срцето, пет месеци во кои секој здив е потежок од претходниот. Пет месеци без насмевките, без гласот и без прегратките на нашите најмили. Во овие месеци болката не стивнува. Секоја мисла води кон нив, секој миг е обоен со тагата по изгубеното. Спомените се единствената сила што нѐ држи исправени. Мостот меѓу вчера и денес. Меѓу присуството и тишината. Љубовта што ја оставија зад себе е вечна и никогаш нема да згасне. Таа љубов е нашиот патоказ, нашата светлина во темнината и доказ дека тие живеат во нас засекогаш“, рече Розета Џамова, сестра на загинатиот Јорданчо Џамов.
Граѓаните на Кочани велат дека градот и понатаму е обвиен со тага, а трагичниот настан останува длабоко врежан во колективната меморија. Во изминатиот период беа организирани неколку протестни маршеви за „ангелите“ од Кочани, на кои граѓаните со свеќи, молитви и пораки за правда ја искажуваа својата болка и незадоволство.
Трагедијата, која се случи на 16 март годинава, предизвика шок и неверување, а институциите најавија истраги и мерки за да се спречат слични случувања во иднина. Но, конечна завршница на случајот сè уште нема, што дополнително ја зголемува недовербата кај јавноста.
Граѓаните порачаа дека времето минува, но болката и барањето за правда остануваат.