Повторно оган во Желино. Продолжи справувањето со пожарот на планината Жеден каде сите индиции укажуваат дека е подметнат. Иако ситуацијата цело време се менува, за сега пет пожари беснеат на територијата на целата држава. Ер трактори гаснат од воздух, пожарникарите од земја. Жителите на Желино се многу претпазливи. Раскажуваат дека стравувале од пожарот, иако и натаму сакаат да веруваат дека огнот не е подметнат од човек.
Состојбата со пожарите во Македонија до 18 часот е седум активни, два под контрола и шест изгаснати. Така соопштија од Центарот за управување со кризи, во последното известување до јавноста.
Кога се во прашање активните пожари, најголемиот дел се во централните и западните делови од државата:
- Општина Василево – с. Нивичино (нискостеблеста шума, смрека, грмушки и ниска вегетација)
- Општина Македонски Брод 1 – с. Грешница (мешана шума и сува трева)
- Општина Македонски Брод 2 (реактивиран) – помеѓу с. Црешнево, с. Локвица, с. Крапа (деградирана дабова шума, грмушки и ниска вегетација)
- Општина Прилеп – помеѓу селата Царевиќ и Смолани (мешана шума и нискостеблеста вегетација)
- Општина Струга – помеѓу селата Октиси и Белица (сува трева)
- Општина Ресен – с. Покрвеник (трски и сува трева)
- Општина Маврово-Ростуше – с. Дуф (ливада)
Според Ангелов, екипите кои се активирани кај Желино успеале да го пресечат огнот и да не дозволат да се прошири кон селото Еребино.
На терен, покрај пожарникари од Скопје и Тетово, имаше и полициски и армиски возила за гаснење огнови. Во земјава и натаму се активни неколку пожари. Гори во Македонски брод, но и во Василево на планината Готен. Дел од пожарите се подметнати, како оној во Куманово, каде е уапсен 27-годишник кој под дејство на алкохол, со молотов коктел предизвикал пожар во Средорек.