Општина Кисела Вода денес беше домаќин на висока делегација од Република Турција, предводена од проф. д-р Бора Акинџе од реномираниот Универзитет „Абдулах Ѓул“, препознаен како еден од најодржливите универзитети во светот. Оваа значајна посета, посветена на одржливоста, иновациите и развојот на нови меѓународни партнерства, претставува важен чекор кон зацврстување на билатералната и институционалната соработка.
Во составот на делегацијата присуствуваа и високи претставници од Метрополитен општина Кајсери, регионалната развојна агенција, како и други значајни институционални партнери од Турција.
На работната средба, градоначалничката на Општина Кисела Вода Бети Стаменкоска-Трајкоска, заедно со гостите отворија суштински прашања поврзани со одржливиот локален развој, унапредувањето на образовната соработка, како и можностите за заедничко аплицирање и имплементација на европски проекти.
- Општина Кисела Вода континуирано прераснува во модерна и отворена општина која ги следи светските трендови за одржливост и иновации. Денешната средба со нашите пријатели и еминентни стручњаци од Република Турција е силна потврда за нашата посветеност кон креирање на стратешки меѓународни партнерства. Размената на искуства со институции кои се глобални лидери во одржливиот развој, како што е Универзитетот ‘Абдулах Ѓул’, ни дава нови перспективи и отвора врати за имплементација на напредни европски практики на локално ниво. Остануваме максимално посветени на иницијативи кои носат реален напредок, прогресивни идеи и пред сè, создаваат нови можности за просперитет на нашите млади-изјави градоначалничката Бети Стаменкоска-Трајкоска.
Средбата помина во исклучително позитивна и конструктивна атмосфера, трасирајќи го патот за идни заеднички иницијативи. Локалната координација и поддршка за реализација на оваа посета беа овозможени од страна на Центарот за рурален развој во Југоисточна Европа и експертот за развој и меѓународна соработка, Бошко Нелкоски.