Непријатна реа, смет во и надвор од контејнерите – ваква е сликата во центарот на главниот град, а се забележува и насекаде низ метрополата. Овие слики наликуваат како да сме заостанати во минатото, но и тогаш имало кој да направи ред на еден главен град. Но сега, за жал, сликата е поразителна, реагираат граѓаните кои буквално се оставени без зборови. Велат, жално е што Скопје од ден на ден се повеќе тоне.
Главниот град Скопје е затрупан со ѓубре и претворен во депонија. Сите контејнери низ градот се преполни, а купишта смет има на тротоарите и на улиците. Со недели не се собира ниту ѓубрето од кантите од куќите.
Градоначалничката на Скопје Данела Арсовска не кажува каде е точно проблемот и зошто не се собира ѓубрето, ниту има соопштение од ЈП „Комунална хигиена“ каде директор е Сабахудин Рустеми, кој е петти директор поставен на чело на оваа функција од Арсовска.
Од Комунална хигиена уверуваат дека претпријатието ги вложува сите напори за да ја одржи динамиката, предвидена со оперативната програма за собирање и транспортирање на комуналниот отпад.
- „ЈП комунална хигиена – Скопје“ се соочува со енормно зголемени количества на одложен комунален, кабаст и градежен отпад, како во самите контејнери, така и во нивната непосредна околина, односно на јавни и сообраќајни површини. Од овие причини може да се случи на одредени локации да има доцнење при собирањето и транспортот на отпадот.“, стои во соопштението од ЈП комунална хигиена – Скопје.