Според првичните податоци, во трката за градоначалник на Град Скопје води Орце Ѓорѓиевски од ВМРО-ДПМНЕ со освоени 77.858 гласови или 39,9 проценти од обработените 86 проценти од гласачките места. Зад него се Амар Мециновиќ од Левица со 26.119 гласови (13,4 проценти) и Каја Шукова од СДСМ со 22.666 гласови (11,52 проценти).
Со тоа, во вториот круг за градоначалник на главниот град ќе се соочат Ѓорѓиевски од ВМРО-ДПМНЕ и Мециновиќ од Левица.
На синоќешната завршна прес-конференција ДИК ги соопшти неофицијалните резултати од првиот круг на локалните избори по обработени 96,11 проценти од гласачките ливчиња – 3.339 од вкупно 3.474 избирачки места – што претставува речиси целосна слика за резултатите..
Претседателот на Државната изборна комисија, Борис Кондарко, информираше дека излезноста на овие избори изнесувала 48,46 проценти, што е нешто пониска во однос на претходните изборни циклуси.
ВМРО-ДПМНЕ и коалицијата што ја предводи е во убедливо водство во 54 општини низ државата, коалицијата ВРЕДИ води во девет, СДСМ во 7, коалицијата НАИ предводена од ДУИ во 5 општини. Демократската партија на Турците има предност во една општина.