Министерот за транспорт и врски Александар Николоски е задоволен од стартот на Градскиот воз, кој за три дена превезол околу 1.500 патници.
„Возењето со воз е нешто што во Европа е најнормално за голем дел од населението, особено во големите урбани центри и мислам дека на Скопје многу ќе му значи не само како намалување на загадувањето, не само како побрзо стигнување од една до друга точка, туку и како стил на живот“, изјави тој во „Тема на денот“ на ТВ Сител, додавајќи дека апсолутно би го користел ако живее во Драчево.
„Денес ако тргнете со автомобил од Драчево до Центар не знаете за колку време ќе стигнете, а просекот е околу педесетина минути, додека со Градски воз е 13. Значи, разликата е многу голема, да не зборувам за пријатноста на патувањето“, објасни тој.
„Првичните анализи се добри, а ние очекуваме дека интересот ќе расте. За три дена имаше околу 1.500 патници, што значи дека станува збор за околу 500 на ден, што е солидна бројка. Очекувам дека за многу брзо време ќе надминеме 20.000 патници и за два месеца ќе имаме 100.000 патници. Доста луѓе и не се информирани, до скоро беа летни одмори, почеток на септември е, така што, како што ќе одминува времето, очекувам повеќе патници на Градскиот воз“, изјави Николоски.