Припадниците на грчката дијаспора во Австралија се кренаа против ,,Македонскиот мермер” кој се користи во реклама за ново возило на јужнокорејската автомобилска компанија.
„Киа Австралија“ се соочи со критики од членовите на грчко-австралиската заедница по објавувањето на новата реклама за нивниот автомобил „тасман“, на кој е прикажан камион за транспорт со натпис „Македонски мермер“ покрај столбови од Партенон во грчки стил, пишува мкд.мк.
Рекламата, во која се појавуваат спортски ѕвезди, меѓу кои се Рафаел Надал и Питер Даикос, поранешен фудбалер во Австралија кој се идентификува како Македонец, беше испратена до „Грик Хералд“ од повеќе читатели загрижени за мешањето на грчките културни симболи со спорната терминологија.
„Разочарувачки е и нечувствително“, рече Стивен, еден од многуте што го контактираа „Грик Хералд“. „Да се прикажуваат слики што јасно се однесуваат на грчкото наследство, како што е Партенон, а потоа да се етикетира како ‘Македонски мермер’ испраќа погрешна порака. Ја замаглува историјата и не го почитува културниот идентитет на Грција.“
Референцата за „Македонски мермер“ – во комбинација со античката грчка архитектура – предизвика конфузија и фрустрација, особено во светлината на долгогодишната историска и политичка чувствителност меѓу Грција и Македонија.
„Во 2018 година, Преспанскиот договор формално го реши деценискиот спор со признавање на соседната земја како Република С. Македонија, со експлицитни обврски за воздржување од употреба на симболи и терминологија поврзани со хеленската историја, вклучително и оние поврзани со античка Македонија – регион историски и географски поврзан со северна Грција“, пишува австралискиот медиум, чијашто целна група е очигледно грчката заедница во Австралија.
За многумина во грчката заедница, сликите и јазикот на рекламата се чини дека го поткопуваат тој договор, предизвикувајќи обновени загрижености за културна злоупотреба и дезинформации.
„Не станува збор за политика – станува збор за почитување на културното наследство“, забележа друг загрижен читател. „Кога компаниите користат моќни културни симболи во маркетингот, тие имаат одговорност да бидат точни и чувствителни“.
Повеќе на мкд.мк