Грузискиот премиер Иракли Кобахидзе изјави дека демонстрантите кои вчера се обидоа насилно да влезат во претседателската палата всушност целеле да ја соборат владата, и ја обвини Европската Унија за мешање во внатрешните работи. Тој го повика амбасадорот на ЕУ, Павел Херчински, да се дистанцира и да ги осуди протестите, нагласувајќи дека странските сили отворено ја поддржуваат опозицијата во обидот за рушење на уставниот поредок. „Никој нема да избега од одговорност, вклучително политичка“, рече Кобахидзе, кој процени дека на митингот учествувале до 7.000 лица.
Британските медиуми пренесуваат дека грузиската полиција во вчерашните немири употребила солзавец и водени топови за да ги растера демонстрантите пред палатата и приведе пет активисти од големиот опозициски протест на денот на локалните избори. Владејачката партија „Грузиски сон“ објави победа во сите општини, откако изборите беа бојкотирани од двата најголеми опозициски блока. Прозападната опозиција протестира од октомври минатата година, по парламентарните избори кои ги нарече нерегуларни.
ЕУ не коментираше, но во јули ја отфрли како дезинформација тврдењето дека сака да ја дестабилизира Грузија, да ја вовлече во војна или да наметне „нетрадиционални вредности“. Овие обвинувања се дел од ескалацијата на тензиите меѓу Тбилиси и Брисел, во време кога Грузија се соочува со протести против владата.