Поранешниот бугарски европратеник Ангел Џамбаски му се придружи на СДСМ во славењето на промената на власта во Унгарија, оценувајќи дека победата на Петер Маѓар била можност за ослабување на „антибугарското влијание“ во Македонија, поттикнато, според него, од досегашниот унгарски премиер Виктор Орбан.
Во интервју за бугарскиот портал „Таралеж“, членот на Европскиот парламент од 2014 до 2024 година ја обвини Владата на Орбан со години ја помагала „абтибугарската политика“ во Македонија, вклучително и преку медиумите и политичките структури, истакнувајќи дека оваа поддршка придонела за воспоставување силна антибугарска пропаганда во регионот.
„Со години ова беше главната антибугарска сила и главниот антибугарски остров во Република Северна Македонија“, рече Џамбаски, изразувајќи очекување дека промената во Унгарија би можела да доведе до намалување на влијанието на антибугарските политички кругови во Скопје и во Белград.
Прашан дали поранешниот македонски премиер Никола Груевски ќе биде екстрадиран од Унгарија, членот на Извршниот комитет на ВМРО-БНД одговори: „Многу се надевам, бидејќи треба да оди во затвор. Овој човек е архитектот на антиквизацијата, со која започна одвојувањето на македонските Бугари од Бугарија. Со теоријата за антиквизација, тој создаде лажна историја и лажна нација“.