Бугарија е единствената земја во Европската унија и на Балканот што нема противпожарни авиони, констатира Момчил Панајотов, професор на Шумарскиот универзитет во Софија, наведувајќи ја како позитивен пример и Македонија.

„Останавме последната земја во ЕУ што има проблем со пожари, а нема таква опрема, и последна на Балканскиот Полуостров. Албанија веќе купи авиони, Македонија има, а да не зборуваме за Турција, Грција и Романија. Сакавме да се споредуваме со Романија кога влеговме во ЕУ. Во овој поглед, како и во многу други, сме далеку зад неа. Очигледно, имаме растечки проблем со пожарите, а немаме специјализирана авијација“, изјави Панајотов за бугарскиот весник „Труд“.